Mark Spitz

Si Mark Andrew Spitz (namundag Pebrero 10, 1950) sarong Amerikano asin dating paralangoy na pankompetisyon, nagin kampyon siyam na beses sa Pakawat Olimpiko, asin dating nagkapot kan rekord sa pitong event. Nasikwit niya pitong medalyang bulawan sa Olimpikong Pakawat sa Tig-init 1972 na ginibo sa Munich, na an nakalampas sana iyo si Michael Phelps kan an huri nakua an walong bulawan sa Olimpikong Pakawat sa Tig-init 2008 sa Beijing. Si Spitz nagtala nin pankinaban na rekord sa pitong event na saiyang binalihan asin ginanahan nin bulawan kan 1972.^[1][2]

Sa pag'oltan kan 1968 asin 1972, si Spitz nanggana nin siyam na Olimpikong bulawan, sarong pirak asin sarong tanso, limang Pan Amerikan na bulawan, 31 titulo sa Amateur Athletic Union (AAU) asin walong titulo sa National Collegiate Athletic Association. Durante kan mga taon na ini, nagtala siya nin 35 pankinaban na rekord, alagad an duwa kaini bakong opisyal. Nagawadan siyang bansag na World Swimmer of the Year kan 1969, 1971 asin 1972 kan magasin na Swimming World.^[3][4]

Si Spitz amay nagretiro sa propesyonal na paglangoy asin sa edad na 22 nagpondo na siya pagbali sa Olimpikong Pakawat. Sinibotan niya an iba-ibang hanap-buhay siring sa pagendorso sa mga komersyal na produkto, paglaog sa pagbentang daga bilang realtor sa California asin pagigin aktor sa mga pelikula asin bilang host sa mga programa sa telebisyon. Nagbalik pa man kuta siya kan 1991 sa kompetisyon asin makakuang lugar sa U.S. Olympic swimming team sa tuyong makalaog liwat sa Olimpikong Pakawat alagad dai siya nagkwalipikar.^[5].

1. ↑ http://www.biography.com/people/mark-spitz-9490898 Archived 2016-08-15 at the Wayback Machine. Kinua 15-8-16
2. ↑ https://www.olympic.org/mark-spitz Kinua 15-8-16
3. ↑ http://www.imdb.com/name/nm0819156/bio Kinua 15-8-16
4. ↑ http://www.sports-reference.com/olympics/athletes/sp/mark-spitz-1.html Kinua 15-8-16
5. ↑ http://www.biography.com/people/mark-spitz-9490898#synopsis Archived 2016-08-15 at the Wayback Machine. Kinua 15-8-16